Beintehaah tujhse main mohabbat karta hun...

Benam raston pe badhti ja rahi thi yeh zindagi...
Na manzil ka pata tha...
Na khud ki takdeer ka...
Na raston ka pata tha...
Na kisi adrishya sanyog ka...
Badnaam hoti ja rahi thi yeh zindagi...
Na khud ka pata tha...
Na apne zameer ka...
Na kisi aashiyane ka pata tha....
Na khud ke bhavishya ka....

Har raat ki subah hoti thi...
Aur har subah ki raat...
Sapne silwaton pe dam tod diya karte the...
Chhup jaya karti thin andheron mein yeh jazbaat...

Fir aagman hua ek shakti ka...
Aankhon mein chamak, hothon pe muskaan...
chanchal hriday ek adhbhut divya insaan...

Pal bhar me badal daali usne yeh zindagi...
Karne laga toot kar main uski bandagi....

Mujh jaise chhote insaan ko bhi usne kitna bada bana daala...
Mere har ek sapne ko apna keh apna bana daala...

Bhavisya uske sang kitna sukhmai lagta hai..
Uski kahi har wo baatein kaano ko kitna anandmai lagta hai...

Abhaga hun main apne rab se usey  maang na main paya...
Kayar hun main apne taqdeer se usey chheen na main paya...

Haar gaya hun khud se main yudhh karte karte...
Thak gaya hun main is visam paristhiti se ladte ladte...

"Wo" na hogi to kaise jiyunga main yeh zindagi...
"Yeh" na honge to kiski karunga main bandagi...

Aaj maine khud ka ek hissa kho diya hai...
Us haseen khwab se, na chah kar bhi, mukh mod liya hai...

Maaf kar de e-swapn pari...main saath na nibha paya...
Bhawishya ki un khubsurat galiyaaron se tujhko na laa paya...

Nikalti Hai dil se dua.. Khushiyan chumengi tera daaman..
Hum na rahe toh na sahi... Phool he phool honge tere aangan...

Jaate jaate ek baat tujhse main kehta hun...
Tu hai ibaadat meri...beintehaah tujhse main mohabbat karta hun...

                                                                                                                        Anjani Roshan